Zehazpenak

Saio honetan, gure familia bizitzaren, gure familiaren oinarri bihurtu nahi ditugun balio eta aukeren inguruan hausnartuko dugu. Jainkoaren seme eta alaba guztiez osaturiko familia unibertsala da Jesusen proposamena eta horrek argi egin diezagula eskatuko dugu.

Ibilbideko helburu nagusiak

Saioaren helburuak

Helduak: 

• Gure familia bizitza nolakoa den aitortu
• Ebanjelioaren proposamena onartuta, gure familiaren euskarri bihurtu nahi ditugun balioen inguruan hausnartu
• Jesusek zein familia-mota proposatzen duen ezagutu eta gure familia bizitza horrekin alderatu
• Familia maitasuna, maitatzen eta zaintzen gaituen Jainkoaren maitasunaren zeinua dela aitortu

Haurrak:

• Askotariko familiak daudela ikusi
• Familiak maite eta zaindu egiten gaituela aitortu
• Guztiok, gizadi osoak, Jainkoaren seme eta alaben familia handia osatzen dugula antzeman

Eskema

Denok gaudela ekingo diogu saioari, partaideak eta saioan landuko den gaia aurkeztuz. Ondoren, heldu eta haurrak banandu egingo dira.

Helduen taldean hausnarketa egingo da Mari Patxi Ayerraren idazkiaren eta honi lotutako galderen haritik. Gure familia bizitza eta Ebanjelioan egiten den proposamena aurrez aurre ipiniko ditugu.

Haurrekin, “familietara” jolastuko dugu, beraiek margotutako kartekin. Jesusen familia aurkeztuko dugu eta Jainkoa guztion Aita dela eta, ondorioz, pertsona guztiok familia handi bakarra osatzen dugula azalduko dugu. Zeinu batzuk irakatsiko dizkiegu haurrei Aitagurea errezatzeko.

Amaieran, denok elkartuko gara eta haurrek ikasi dituzten zeinuekin errezatuko dugu Aitagurea.

Saioaren amaieran, Familia Eukaristia nabarmenduko dugu eta parte hartzera deitu. Jesusen adiskideen familiako kide gara eta familia hori Eukaristian elkartzen da. Egokia litzateke, saio honetan,  parrokian (PB) ospatuko den hurrengo Eukaristian parte hartzeko konpromisoa hartzea.

13. Saioaren garapena deskargatu PDF Deskargatu